बिरगंज । कास्की प्रहरीले सूर्यदर्शन सहकारीको ठगीबारे तीन महिनाभन्दा बढी समयको अनुसन्धानपछि सोमबार जिल्ला सरकारी वकिल कार्यालय कास्कीमा प्रतिवेदन बुझाएको छ । मङ्सिर २७ गते थपिएको पाँच दिनको म्याद सकिनुअघि नै प्रहरीले सोमबार दिउँसो प्रतिवेदन बुझाएको हो ।
राष्ट्रिय स्वतन्त्र पार्टी (रास्वपा) सभापति रवि लामिछानेसहित गोर्खा मिडिया प्रालिका पूर्वउपाध्यक्ष छविलाल जोशी, नेचर हर्बल्सका सञ्चालक रामबहादुर खनाल, जिबी एन्ड ग्रुपकी कर्मचारी लीला पछाई र सहकारीका पूर्वसञ्चालक कृष्ण गुरुङलगायतमाथि अनुसन्धान गरी प्रतिवेदन बुझाएको हो ।
यसअघि कास्की जिल्ला अदालतमा मुद्दा दर्ता भई विचाराधीन रहेका १९ जनाविरुद्ध पनि अनुसन्धान गरी पूरक प्रतिवेदन बुझाइसकिएको छ । सूर्यदर्शन सहकारी प्रकरणका अनुसन्धान अधिकृत प्रहरी नायब उपरीक्षक वसन्तकुमार शर्माले पूरक प्रतिवेदन मङ्सिर २६ गते र थप प्रतिवेदन सोमबार बुझाइएको जानकारी दिनुभयो ।
प्रतिवेदनमा लामिछानेसहित ५१ जनालाई प्रतिवादी बनाउन सिफारिस गरिएको छ । “६५ जनाविरुद्ध अनुसन्धान गरेकोमा ५१ जनालाई प्रतिवादी बनाउन सिफारिस गरेका छौँ,” प्रनाउ शर्माले भन्नुभयो, “विपक्षी बनाइएकामध्ये कास्की प्रहरीको हिरासतमा पाँच जना र नौ जना
पुर्पक्षका लागि थुनामा हुनुहुन्छ ।” प्रतिवेदनमा सहकारी ठगी, सङ्गठित अपराध र सम्पत्ति शुद्धीकरण गरी तीन अभियोगमा मुद्दा चलाउन सिफारिस गरिएको छ ।
अनुसन्धान भएका बाँकी व्यक्तिको ठेगाना नखुलेकाले खुलेका बखत प्रतिवादी बनाएर मुद्दा अघि बढाउने तयारी छ । प्रहरी प्रतिवेदनमा एक अर्ब ५१ करोड ४० लाख १९ हजार १९४ रुपियाँ बिगो मागदाबी लिन सुझाइएको छ । प्रहरीले प्रतिवादी बनाएकामध्ये ३७ जना अझै फरार छन् । सूर्यदर्शन सहकारीको अनुसन्धानका लागि कास्की प्रहरीलाई केन्द्रीय अनुसन्धान ब्युरो (सिआइबी) ले पनि सघाएको थियो ।
जिल्ला सरकारी वकिल कार्यालय कास्कीकी जिल्ला न्यायाधिवक्ता कमला काफ्लेले दुवै प्रतिवेदन प्राप्त भएको र ती प्रतिवेदन अनुसन्धानका क्रममा रहेको उल्लेख गर्नुभयो । ती प्रतिवेदन अध्ययन, विश्लेषण गरी पहिलो चरणमा कार्यालयले मुद्दा चल्ने वा नचल्ने निर्णय लिने छ । “मुद्दा चल्ने निर्णय भएमा प्रहरी प्रतिवेदनका आधारमा अभियोगपत्र तयार हुन्छ,” काफ्लेले भन्नुभयो, “भोलि (मङ्गलबार) नै प्रतिवेदन तयार हुने अवस्था छैन । प्रतिवेदन तयार गर्न हामीलाई आवश्यक म्याद प्राप्त हुने अपेक्षा गरेका छौँ ।”
लामिछानेसहित पाँच जनाविरुद्ध थपिएको पाँच दिनको म्याद सोमबारै सकिएको छ । मङ्गलबारबाट बढीमा चार दिनभित्र अभियोगपत्र बुझाइसक्नुपर्ने कानुनी बाध्यता छ । मङ्गलबार उनीहरूलाई म्याद थपका लागि अदालत लैजाने तयारी छ । अनुसन्धान गरिएका तीन अभियोगमध्ये सबैभन्दा बढी सम्पत्ति शुद्धीकरणमा तीन महिनाभित्र अभियोजन गर्नैपर्ने कानुनी व्यवस्था छ । सूर्यदर्शनको पूरक अनुसन्धानमा सबैभन्दा पहिले पूर्वउपाध्यक्ष छविलाल जोशीलाई असोज ६ गते पक्राउ गरेको थियो ।
जोशीसँगै सबैलाई अभियोजन गरिने हुँदा पुस ५ गतेभित्र सरकारी वकिल कार्यालयले अभियोगपत्र अदालतमा बुझाइसक्नु पर्छ । प्रहरीले अनुसन्धानका क्रममा लामिछानेले विभिन्न सहकारीलाई ऋण तिर्न काटेको चेक पनि बरामद गरेको थियो । सांसद सूर्य थापा नेतृत्वको संसदीय समितिको प्रतिवेदनले सूर्यदर्शन सहकारीबाट पाँच करोड ५८ लाख गोर्खा मिडियामा गएको उल्लेख गरेको छ ।
लामिछानेलगायतलाई पोखराको सूर्यदर्शन, काठमाडौँको स्वर्णलक्ष्मी सहकारी, बुटवलको सुप्रिम बचत तथा ऋण सहकारी संस्था, साहारा चितवन बहुउद्देश्यीय सहकारी संस्था, वीरगन्जको सानो पाइला बचत तथा ऋण सहकारी र नेपालगन्जको समानता सहकारीको रकम गोर्खा मिडियामा लगेर अपचलन गरेको अभियोग छ । देशभरका सहकारीबाट ६५ करोड गोर्खा मिडिया नेटवर्कमा गएको देखिएको छ । गोर्खा मिडिया नेटवर्कका तत्कालीन प्रबन्ध निर्देशकसमेत रहनुभएका लामिछानेलाई कात्तिक २ गते प्रहरीले काठमाडौँबाट पक्राउ गरी पोखरा ल्याएको थियो । लामिछानेको नाममा सूर्यदर्शन सहकारीबाट एक करोड रकम जम्मा भएको देखिएको छ ।
सरकारी वकिल कार्यालयमार्फत मुद्दा दायर भएपछि अदालतबाट पुर्पक्षका लागि थुनामा पठाउने, धरौटी लिएर छाड्ने वा साधारण तारिखमा छाड्नेमध्ये एक आदेश आउने छ । रविलाई धरौटी वा साधारण तारिखमा छाड्ने आदेश भए अन्यत्रका चार सहकारी ठगीमा पक्राउ पुर्जी जारी भएकाले प्रहरीले उहाँलाई हिरासतमै राख्न सक्ने छ । पाँच वटै ठाउँमा लामिछानेको बयान लिइसकिएको छ । यो अवधिमा लामिछानेलगायतलाई सात पटक म्याद थप गरी अनुसन्धान भएको छ ।
-1734846227.jpg)
