बिरगंज । नयाँ वर्ष सन् २०२५ मनाउन आएका भारतीय पर्यटकलाई ठोरीमा स्वागत गरिएको छ ।
मधेश प्रदेशकै मुख्य पर्यटकीय गन्तव्यको रूपमा रहेको पर्साको ठोरी घुम्न आएका भारतीय पर्यटकहरूलाई ढाका टोपी लगाएर स्वागत गरिएको ठोरी गाउँपालिका–२ का अध्यक्ष अमृतकृष्ण सापकोटाले जानकारी दिए । उनका अनुसार बुधबार सबैभन्दा अगाडि ठोरी घुम्न आएका १०० जना भारतीय पर्यटकलाई ढाका टोपी र टिका लगाएर स्वागत गरिएको हो ।
विशेष गरेर नयाँ वर्षका दिन भारतीय पर्यटकहरू ठोरी घुम्न आउने गर्छन् । भारतीय पर्यटकहरूलाई आकर्षण गराउन पनि राष्ट्रिय टोपी दिवसको अवसरमा ढाका टोपी लगाएर स्वागत गरिएको उनले बताए ।
सापकोटाका अनुसार भारतबाट ठोरी प्रवेश गर्ने मुख्यद्वारमा पर्यटकहरूलाई स्वागत गर्न ठोरी गाउँपालिकाको एक टोली नै खटिएको छ ।
नेपाल घुम्न आउने पर्यटकहरूलाई नाकामै ढाका टोपी लगाएर स्वागत गरिँदा पर्यटकहरू उत्साहित बनेको उनले बताए ।
पर्यटकहरूलाई स्वागत गर्न ठोरी नाकामा गाउपालिका उपाध्यक्ष गोकुलीकुमारी रेग्मी, प्रमुख प्रशासकीय अधिकृत धर्मराज थापा, वडाध्यक्षहरू अमृतकृष्ण सापकोटा, शम्भु खड्का, मानबहादुर थिङ, अष्टबहादुर लोप्चनलगायत खटिएका छन् ।
नयाँ वर्ष मनाउन आउने आन्तरिक एवम् भारतीय पर्यटकहरूले ठोरीका पर्यटकीय स्थलहरूमा भरिभराउ हुने गर्दछन् । बस, बलेरो, कार, म्याजिक भ्यान, ट्रयाक्टर, मोटरसाइकलमार्फत विशेष गरेर भारतीय पर्यटकहरु ठोरी आउने गरेका छन् ।
ठोरीको ह्वाइट हिलको काख, राइधारा, अमृतधारा, रानीवनलगायत आसपास क्षेत्रमा आन्तरिक एवम् भारतीय पर्यटकहरू वनभोज तथा घुम्न आउने गर्दछन् ।
भारतको नरकटियागन्ज, बेतिया, मोतिहारी, दिल्ली, बंगलो लगायत सहरहरूबाट भारतीय पर्यटकहरू नयाँ वर्ष मनाउन ठोरी आउने गर्दछन् ।
ठोरीको धार्नीखोला र व्यारेक खोलामा रहेको झोलुङ्गे पुल चढेर आवतजावत गरेर निकै आनन्द लिने गर्दछन् भने ह्वाइट हिल र रेडहिल चढेर पनि नेपाल साँच्चिकै पहाडै पहाडको देश रहेछ भनेर आनन्द लिने गरेको सापकोटाको भनाइ छ ।
बारा, पर्सा, चितवन, रौतहटलगायतका जिल्लाबाट पनि आन्तरिक पर्यटकहरू ठोरी घुम्न आउने गरेको उनले जानकारी दिए ।
-1735966597.jpeg)
-1735966597.jpeg)
