राष्ट्रिय स्वतन्त्र पार्टीको केन्द्रीय समिति बैठक शुरू

समाचार

गृहपृष्ठ
समाचार
राष्ट्रिय स्वतन्त्र पार्टीको केन्द्रीय समिति बैठक शुरू

राष्ट्रिय स्वतन्त्र पार्टीको केन्द्रीय समिति बैठक शुरू

शनिबार, पुस २०, २०८१ ज्योति दैनिक

काठमाण्डौ । राष्ट्रिय स्वतन्त्र पार्टी (रास्वपा)को दुई दिने केन्द्रीय समितिको बैठक आजदेखि काठमाण्डौमा शुरू भएको छ । बैठकको पहिलो दिन आज सहकारीसम्बन्धी अध्यादेश–२०८१ र संसदमा दर्ता भएका विधेयकमाथि छलफल केन्द्रित छ ।

बैठकले सहकारीसम्बन्धी अध्यादेश र संसदमा दर्ता भएका विधेयकमाथि छलफल गर्दै पार्टीको धारणा प्रस्तुत गर्ने कार्यवाहक प्रवक्ता मनिष झाले जानकारी दिनुभयो ।

यस्तै आजको बैठकमा रिक्त स्थानिय तहमा मङ्सिर १६ मा भएको उपचुनावको समीक्षा गर्दै समसामयिक राजनीतिक छलफल र रिपोर्टिङ गर्ने कार्यक्रम पनि तय भएको छ । बैठकको दोस्रो दिन भोलि संविधानको परिमार्जन सम्बन्धमा छलफल गर्ने कार्यवाहक प्रवक्ता झाले बताउनुभयो ।

त्यस्तै रास्वपाको जलेश्वर बैठक र राष्ट्रिय भेलामा प्रस्तुत पार्टी सभापतिको राजनीतिक प्रतिवेदनका आधारमा पार्टीको आगामी कार्यदिशासँगै कार्यक्रम तालिकाबारे छलफल हुनेछ ।

यस्तै केन्द्रीय समिति, सल्लाहकार परिषद्, थिंकट्यांक एवम् केन्द्रीय विभागको पुनःसंरचना, पार्टीको आचारसंहिता र बैठक सञ्चालन कार्यविधि संशोधनका विषयमा गर्नेछ ।

रास्वपाको केन्द्रीय समितिमा सभापति रवि लामिछानेसहित ६१ जना सदस्य छन् । सभापति लामिछानेलाई सहकारी ठगी, सङ्गठित अपराध र सम्पत्ति शुद्धीकरण मुद्दा लागेपछि पार्टीको कार्यवाहक सभापति डोरप्रसाद अर्याल हुनुहुन्छ ।

प्रकाशित मिति: शनिबार, पुस २०, २०८१ ११:३५