कस्तो छ पृथ्वीनारायण शाहको ससुराली घर ?

समाचार

गृहपृष्ठ
समाचार
कस्तो छ पृथ्वीनारायण शाहको ससुराली घर ?

कस्तो छ पृथ्वीनारायण शाहको ससुराली घर ?

शनिबार, पुस २७, २०८१ ज्योति दैनिक

हेटौंडा, २७ पुस । मकवानपुरगढीको अलग्गै इतिहास छ । यहाँको दरबारलाई राजा पृथ्वीनारायण शाहको ‘ससुराली घर’का रुपमा इतिहासकारहरुले व्याख्या गरेका छन् । हेमकर्ण सेनको समयमा गोरखाका राजा पृथ्वीनारायण शाहसँग मकवानपुरको सम्बन्ध गासिएको र हेमकर्णले आफ्नी छोरी पृथ्वीनारायण शाहलाई दिएको इतिहासमा उल्लेख छ ।

मकवानपुरगढी गाउँपालिका–२ मा अवस्थित गढी किल्लाभित्र रहेका दरबार, मन्दिर र पर्खालहरू जीर्णोद्धार गरेर चिरिच्याट्ट पारेपछि यो ठाउँको महत्व झल्किएको छ । अग्लो डाँडामा रहेको गढीबाट अवलोकन गर्न सकिने प्राकृतिक दृश्यहरु पर्यटकलाई लोभ्याउने गरेको छ ।

संस्कृति, पर्यटन तथा नागरिक उड्ड्यन मन्त्रालयले प्रवद्र्धन गर्नुपर्ने नयाँ सय वटा पर्यटकीय गन्तव्यमा समेटेको यो गढीमा ऐतिहासिक पक्षको अध्ययन र अनुसन्धान गर्न विशेषगरी विद्यार्थीहरु पुग्ने गरेका छन् ।

सदरमुकाम हेटौंडाबाट करिब १७ किलोमिटर उत्तर–पूर्वमा रहेको छ । काठमाडौंको कान्तिलोकपथबाट हुँदै काठमाडौं–ठिंगन–हेटौंडा ६८ किमि ३ घण्टामा जीपमा मकवानपुरगढी पुग्न सकिन्छ ।