विपिन जोशीको रिहाइको माग गर्दै तेलअभिभमा प्रदर्शन

समाचार

गृहपृष्ठ
समाचार
विपिन जोशीको रिहाइको माग गर्दै तेलअभिभमा प्रदर्शन

विपिन जोशीको रिहाइको माग गर्दै तेलअभिभमा प्रदर्शन

सोमबार, पुस २९, २०८१ ज्योति दैनिक

काठमाडौं । नेपाली विद्यार्थी विपिन जोशीको रिहाइको माग गर्दै इजरायलको तेल अभिभमा हजारौं इजरायली नागरिकले प्रदर्शन गरेका छन् ।

प्यालेस्टिनी लडाकु समूह हमासले हालै जारी गरेको नयाँ बन्धक रिहाइ सूचीमा नेपाली विद्यार्थी जोशीको नाम नपरेपछि उक्त प्रदर्शन गरिएको हो । २०२३ अक्टोबर ७ मा हमासले विपिनलाई बन्धक बनाएको बताइन्छ । प्रदर्शनको क्रममा प्रदर्शनकारीले विपिन जोशीको तस्विर भएको प्लेकार्ड बोकेको देख्न सकिन्छ ।

विपिनसहित आफ्ना नागरिकको रिहाइको माग गर्दै तेल अभिभमा ठूलो संख्यामा इजरायलीले प्लेकार्ड बोकेर प्रार्थना र प्रदर्शन गरेको अन्तर्राष्ट्रिय सञ्चारमाध्यमले जनाएका छन् । अमेरिकी राष्ट्रपतिको रूपमा डोनाल्ड ट्रम्पको शपथ ग्रहण समारोहअघि यो अन्तिम प्रदर्शन हुने प्रदर्शनकारीहरूको आशा छ । नवनिर्वाचित राष्ट्रपति ट्रम्पले जनवरी २० मा पद तथा गोपनीयताको शपथ लिँदै छन् ।

यसअघि नै दुवै पक्षबीच युद्धविराम र बन्धक रिहाइका लागि अमेरिकी वर्तमान राष्ट्रपति जो बाइडन प्रशासनले निरन्तर दबाब दिइरहेको छ । बाइडन प्रशासनको दबाबपछि हाल कतारको दोहामा हमास र इजरायलका प्रतिनिधि मण्डलबीच वार्ता सुरु भएको छ । अनुकूल वातावरण सिर्जना गर्न हमासले बन्धक बनाइएका ३४ जनाको सूची सार्वजनिक गरेको छ । तर, विपिन जोशीको नाम सूचीमा समावेश छैन । उनी हालसम्म जीवित छन् कि मरिसके भन्ने यकिन हुन सकेको छैन ।

प्रकाशित मिति: सोमबार, पुस २९, २०८१ ११:४१