काठमाडौं । सामाजिक सञ्जालमा नीला आँखावाली एक किशोरी चर्चामा छिन् । भारतको प्रयागराजमा चलिरहेको महाकुम्भ मेलामा माला बेच्दै गरेकी युवती आकर्षक नीला आँखा र मीठो मुस्कानले अहिले देशविदेशमा भाइरल छिन् ।
ती हुन् मोनालिसा भोस्ले, जसलाई भाइरल मोनालिसाको नाम दिइएको छ । उनले मेलामा रुद्राक्षका माला बेच्छिन् । त्यही बेला उनको सौन्दर्यमा लोभिएका केही मान्छेले भिडियो खिचेर सामाजिक संजालमा पोस्ट गरे । भिडियो रातारात भाइरल भयो ।
मोनालिसाको गाढा छाला, सुन्दर आँखा अनि लवजलाई धेरैले मन पराउन थाले । त्यसयता उनको चर्चा देश विदेशमा चुलिएको छ । केही मिडिया रिपोर्टमा निर्देशक सनोज मिश्राले फिल्मको अफर गरेको दावी गरेका छन् । मिश्राले यसअघि ‘दी डायरी अफ वेस्ट बंगाल’ र ‘रामकी जन्मभूमि’जस्ता फिल्म निर्देशन गरेका छन् ।
अनलाइन भाइरल हुन थालेपछि मेलामा उनको पसल बाहिर मान्छेको भीड लाग्न थाल्यो । अटोग्राफ लिन र तस्वीर खिचाउनेको भीड जम्मा हुन थाल्यो । भीड बढ्न थालेपछि १६ वर्षिया किशोरीमाथि दुव्र्यवहार समेत हुन थाल्यो । परिवार छोरीको सुरक्षालाई लिएर चिन्तित हुन थाल्यो ।
एक भिडियोमा मोनालिसालाई पसल वरपर मान्छेले तानिरहेको देखाइएको थियो । त्यतिबेला परिवारले माथिबाट कपडाले ढाक्नुपरेको थियो । वास्तवमा यो चिन्ताको विषय बन्यो । यसपछि उनका पिताले घर फर्काइदिए ।
मोनालिसा मेलाबाट फर्केपछि पनि क्लिप भाइरल भए । केही भिडियोमा स्थानीय मेकअप आर्टिस्टबाट मेकओभर गरिरहेको देखियो । मेकअप गर्दा उनको प्राकृतिक सौन्दर्य ढाकिएको भन्दै विरोध पनि भयो । धेरैले उनको प्राकृतिक सौन्दर्य राम्रो रहेको बताए ।
यसरी माला बेचेर बस्ने किशोरी रातारात भाइरल बनिन् । उनको यो यात्रा महाकुम्भ मेलादेखि बलिउडसम्म निकै कठिन थियो । इन्टरनेटको प्रसिद्धिले उनलाई चर्चामा ल्यायो, यसको कारण उनले मानसिक र शारीरिक दुःख पनि भोग्नुपर्यो । उनको चर्चा यतिसम्म छ कि भारतीय मूलधारका मिडियाले समेत कभरेज गरिरहेका छन् ।
-1738203519.jpeg)
