यसपटक एसईईका विद्यार्थीलाई परीक्षा केन्द्र टाढा हुने जोखिम

समाचार

गृहपृष्ठ
समाचार
यसपटक एसईईका विद्यार्थीलाई परीक्षा केन्द्र टाढा हुने जोखिम

यसपटक एसईईका विद्यार्थीलाई परीक्षा केन्द्र टाढा हुने जोखिम

आइतबार, माघ २०, २०८१ ज्योति दैनिक

काठमाण्डौ । माध्यमिक शिक्षा परीक्षा (एसईई) को केन्द्र राख्न न्यूनतम विद्यार्थी सङ्ख्या तोकेपछि परीक्षा केन्द्र टाढा हुने जोखिम बढेको छ । राष्ट्रिय परीक्षा बोर्डअन्तर्गत परीक्षा नियन्त्रण कार्यालय कक्षा १० ले शिक्षा विकास तथा समन्वय इकाईलाई पत्र पठाएर न्यूनतम विद्यार्थी सङ्ख्या रहनेगरी मात्रै परीक्षा केन्द्र तोक्न भनेपछि समस्या पर्ने भएको हो ।

बोर्डका अनुसार दुर्गम र हिमाली क्षेत्रमा एउटा परीक्षा केन्द्रमा कम्तीमा एक सय ५० जना, पहाडी क्षेत्रमा दुई सय ५० जना तथा तराई/मधेस र काठमाण्डौ उपत्यकामा कम्तीमा तीन सय जना विद्यार्थी रहने गरी केन्द्र निर्धारण गर्नुपर्छ । तर हिमाली क्षेत्रमा एक सय ५० र पहाडी क्षेत्रमा दुई सय ५० विद्यार्थी जुटाउन धेरै विद्यालयका लागि एउटै परीक्षा केन्द्र तोक्नुपर्ने हुन्छ ।

सोलुखुम्बुको लिखुपिके गाउँपालिकामा रहेका तीनवटा माध्यमिक विद्यालयमा गरी ७१ जना मात्रै विद्यार्थी छन् । सङ्ख्या नपुगेर गाउँपालिकाभर परीक्षा केन्द्र नहुँदा विद्यार्थीहरु परीक्षा दिन झन्डै १० घण्टा टाढा सदरमुकाम पुग्नुपर्छ । सोलुखुम्बुकै खुम्बुपासाङल्हमु गाउँपालिकामा पनि एउटा परीक्षा केन्द्र राख्न विद्यार्थी पुग्दैनन् । यस्तो समस्या अरू धेरै पालिकामा रहेको छ ।

परीक्षा नियन्त्रण कार्यालय कक्षा १० का परीक्षा नियन्त्रक नन्दलाल पौडेल शिक्षाको गुणस्तर कायम गर्न परीक्षा पनि महत्वपूर्ण रहेकोले कडाइ गर्न लागेको बताउनुहुन्छ । यो पुरानै व्यवस्था भए पनि यस वर्ष कार्यान्वयनमा कडाइ गरेको उहाँले बताउनुभयो ।

कुनै पालिकाभर परीक्षा केन्द्र नहुने र त्यहाँका विद्यार्थी निकै टाढा पुग्नुपर्ने अवस्थामा जिल्ला परीक्षा समन्वय समितिले निर्णय गरेर न्यूनतम मापदण्डभन्दा कम विद्यार्थी राखेर पनि केन्द्र तोक्न सक्ने परीक्षा नियन्त्रक नन्दलाल पौडेलले उज्यालोलाई जानकारी दिनुभयाे ।

प्रकाशित मिति: आइतबार, माघ २०, २०८१ १२:०५