वीरगञ्ज । वीरगञ्जको ठाकुरराम बहुमुखी क्याम्पसमा १६ वर्षपछि भएको स्वतन्त्र विद्यार्थी युनियन (स्ववियु) निर्वाचन मंगलबार शान्तिपूर्ण रूपमा सम्पन्न भएको छ ।
कुल १० हजार ७२९ मतदातामध्ये ४० प्रतिशत अर्थात् ४ हजार २९९ मत खसेको प्रमुख निर्वाचन अधिकृत दिलिप सिंहले बताए ।
निर्वाचनको क्रममा केही सानातिना विवाद देखिए पनि स्थिति नियन्त्रणमा रहेको र मतदान प्रक्रिया प्रभावित नभएको उनले जानकारी दिए ।
यसअघि २०६३ सालमा भएको स्ववियु निर्वाचनबाट चुनिएका पदाधिकारी र सदस्यहरूको कार्यकाल २०६५ मा सकिएयता ठाकुरराम क्याम्पसमा स्ववियु निर्वाचन हुन सकेको थिएन । मंगलबार बिहान १० बजेदेखि साँझ ५:३० बजेसम्म चलेको मतदान प्रक्रिया निर्धारित समयमा बिहान ८ बजे सुरु हुने भनिए पनि तयारीमा ढिलाइका कारण दुई घण्टा ढिलो भएको थियो ।
मतगणना भने राति १० बजेदेखि सुरु गर्ने निर्णय सुरक्षा निकायका प्रमुख र सभापतिका १४ उम्मेदवारहरूको सहमतिमा गरिएको छ ।
निर्वाचनमा सभापति पदका लागि विभिन्न दलनिकट र स्वतन्त्र गरी १४ जना उम्मेदवार प्रतिस्पर्धामा थिए । कुल २१ पदका लागि २४७ जनाले उम्मेदवारी दिएका थिए, जसमा प्रत्यक्षतर्फ सभापति, सचिव, कोषाध्यक्ष र ११ सदस्य तथा समानुपातिकतर्फ १० सदस्य पद समावेश छन् ।
निर्वाचनको अवलोकन र सुरक्षाका लागि पर्साका प्रमुख जिल्ला अधिकारी (सिडिओ) र जिल्ला प्रहरी कार्यालय पर्साका प्रहरी उपरीक्षक (एसपी) गौतम मिश्रसहित प्रशासन र सुरक्षा निकायका अधिकारीहरू क्याम्पसमा उपस्थित थिए ।
निर्वाचनमा सञ्चारकर्मीहरूमाथि भने पटक-पटक दुर्व्यवहार भएको गुनासो सुनियो । सुरुमा सञ्चारकर्मीहरूलाई प्रवेशमा रोक लगाइएको थियो । पछि प्रवेश गर्न दिइए पनि प्रहरीले केही समयमै उनीहरूलाई बाहिर निकालेको थियो । घटनाले सञ्चार क्षेत्रमा असन्तुष्टि पैदा गरेको छ ।
निर्वाचनले लामो समयदेखि रोकिएको ठाकुरराम क्याम्पसको विद्यार्थी नेतृत्व चयन प्रक्रियालाई पुनर्जनन दिएको छ । मतगणनाको नतिजाले नयाँ नेतृत्वलाई स्वागत गर्ने बाटो खोल्नेछ ।
