पर्सा । पर्साको बिरगंजस्थित ठाकुर राम बहुमुखी क्याम्पसमा भएको स्वतन्त्र विद्यार्थी युनियन (स्ववियु)को निर्वाचनमा नेविसंघको विद्रोही स्वतन्त्र प्यानलै विजयी भएको छ । नेविसंघ विद्रोही स्वतन्त्र उम्मेद्वारको कमाण्डर प्रदेश सभा सदस्य श्याम पटेलले गर्दै आएका प्यानलबाट अध्यक्षमा राजकुमार यादव १११५ मत ल्याउँदै ४६२ मतले निर्वाचित भएका हुन्।
नेविसंघमा विवाद हुँदा यादवको नेतृत्वमा प्यानलै स्वतन्त्र उम्मेद्वारी परेको थियो। तर अन्तिम समयमा नेविसंघले विकास मण्डल नेतृत्वको प्यानललाई नै समर्थन गरेको थियो। अध्यक्षमा निर्वाचित यादव यसअघि नेविसंघ नेता मुनराज तिवारी गुटका नेता हुन् ।
प्रतिस्पर्धी नेविसंघका उम्मेदवार विकास मण्डलले ६५३ मत ल्याउँदै पराजीत भएका हुन् । नेविसंघ इकाइ नेता रहेका मण्डलले नेविसंघबाट उम्मेदवारी दिएपनि संगठनले उनलाई आधिकारिक उम्मेदवार मानेको भए पनि उनी लोकप्रिय उम्मेदवार नभई गुटको उम्मेदवार भएको भन्दै उनलाई विद्यार्थीहरुले मन पराएका थिएनन् ।
सचिवमा मन्दिरा कुमारी चौधरी र कोषाध्यक्षमा अंकित पटेल विजयी भएका छन्। सदस्यहरूमा आयुष श्रीवास्तव , आयुष कुमार गुप्ता, अमित पटेल , श्याम कुमार महतो , नेहा पासवान , अशोक कुमार महतो , दीपिका भण्डारी र माला कुमारी साह निर्वाचित भए ।
नेविसंघबाट स्वतन्त्र उम्मेद्वार भई निर्वाचित भएका राजकुमार यादवको पक्षमा नेपाली कांग्रेसका केन्द्रीय सदस्य एवं कानुन मन्त्री अजय कुमार चौरसिया , प्रदेश सभा सदस्य श्याम पटेल , पूर्व मन्त्री सुरेन्द्र चौधरी , नेता अजय द्विवेदी लगायतका नेताहरु रहेका थिए ।
भने नेविसंघ उम्मेदवार विकास मण्डलको पक्षमा जिल्ला सभापति एवं मधेस प्रदेशका कृषि मन्त्री जनार्दन सिंह क्षेत्री , पूर्व उद्योग मन्त्री एवं संघीय सांसद रमेश रिजाल , अनिल रुङ्गाटा लगायतका नेताहरु थिए ।
यस्तै सभापति उम्मेदवार समाजवादी विद्यार्थी युनियनका हरीकीशोर यादव ५६२ , सुधीर पटेल समुहको कमलेश कुमार यादव ४५० र अनेरास्ववियुका पवन यादव ३८६ मत ल्याएका हुन् ।
