वीरगञ्ज । वीरगञ्ज महानगरपालिका – १६ नगवास्थित प्रहरी चौकी नगवाकोको केही अगाडि शनिवार बिहान एक जना महिलाको शव शङ्कास्पद अवस्थामा फेला परेको छ ।
मृतक महिला वीरगञ्ज महानगरपालिका – ४ नर्सिङ क्याम्पस क्षेत्रमा बसोबास गर्ने अंसिया अग्रवाल रहेको जिल्ला प्रहरी कार्यालय पर्साले पुष्टि गरेको छ ।
पर्सा प्रहरीका प्रवक्ता, प्रहरी नायव उपरीक्षक (डिएसपी) किशोर लम्सालका अनुसार, महिलाको मृत्युको कारण हालसम्म स्पष्ट हुन सकेको छैन । यद्यपि, प्रारम्भिक अनुसन्धानका क्रममा महिलाको कानको छेउमा र औलाहरूमा चोटपटक लागेको देखिएको छ ।
घटनास्थलको अवस्था हेर्दा जङ्गली जनावरको आक्रमणले अथवा लडेर मृत्यु भएको हुनसक्ने प्रहरीको प्रारम्भिक अनुमान रहेको डिएसपी लम्सालले जानकारी दिए । “अनुसन्धान गर्ने क्रममा महिलाको शवमा चोटपटक र नीलडामहरू देखिएको छैन । बरु कानको छेउ र औलाहरू कुनै जङ्गली जनवारले खाएको जस्तो देखिएको छ,” उनले भएन । तर, मृत्युको वास्तविक कारण शव परीक्षणको रिपोर्टपछि मात्र थाहा हुने उनको भनाइ छ ।
मृतकको शव वीरगञ्जस्थित नारायणी अस्पतालमा पोस्टमार्टमका लागि पठाइएको उनले बताए । घटनाको प्रकृति हेर्दा शङ्कास्पद देखिए पनि अनुसन्धान पश्चात् नै केही भन्न सकिने डिएसपी लम्सालले बताए ।
प्रहरी स्रोतका अनुसार, शवको प्रकृति, घाउको अवस्थालगायत विषयमा विस्तृत छानबिनपछि मात्र घटनाको वास्तविकता बाहिर आउनेछ । स्थानीयवासीमा भने घटनाले त्रास र चिन्ता उत्पन्न गरेको छ ।
प्रहरीले घटनाबारे थप अनुसन्धान जारी राखेको र शीघ्रै सत्य तथ्य सार्वजनिक गर्ने प्रतिबद्धता जनाएको छ ।
-1743606483.jpeg)
