वीरगञ्ज । नेकपा एमाले पर्साले गणतन्त्रको पक्षमा वृहत् मोटरसाइकल र्यालीको आयोजना गर्ने भएको छ ।
पछिल्लो समय राजवादीहरूले बढाएको सक्रियताले गणतन्त्रमाथि खतरा बढेकोले गणतन्त्रको पक्षमा जनसमर्थन जनाउने उद्देश्यका साथ एमाले पर्साले आगामी चैत २० गते वीरगञ्जमा मोटरसाइकल र्याली गर्ने भएको हो ।
एमाले पर्साका उपाध्यक्ष तथा जन सङ्गठन संयन्त्र प्रमुख मनोज कुमार गुप्ताले एउटा पत्र जारी गर्दै पार्टीको केन्द्रीय सर्कुलर अनुसार गणतन्त्रको पक्षमा चैत २० गते दिउँसो १२ बजेदेखि वृहत् र्याली आयोजना गरिने जानकारी गराएका छन् ।
पर्साको छिपहरमाई गाउँपालिकाको अध्यक्ष समेत रहेका गुप्ताले र्यालीमा सहभागिता जनाउनका निमित्त एमाले निकट सङ्गठन तथा कमिटीबाट र्याली लिएर बिहान साढे ११ बजे वीरगञ्जको पावर हाउस चोक पुग्न आह्वान गरेका छन् ।
पावर हाउस चोकमा जम्मा भएपछि मोटरसाइकल र्यालीले वीरगञ्जको नगर परिक्रमा गर्ने पनि पत्रमा जानकारी गराइएको छ ।
उनले मोटरसाइकलमा आ-आफ्नो जन सङ्गठनको झन्डा राख्न र अनिवार्य रूपमा उपस्थित हुन् पनि आग्रह गरेका छन् ।
“नेकपा एमालेको केन्द्रीय सर्कुलर अनुसार गणतन्त्रको पक्षमा यही मिति २०८१ चैत २० गते मोटरसाइकल र्याली वीरगञ्जमा आयोजना हुने हुँदा आ-आफ्नो जन सङ्गठन कमिटीबाट मोटरसाइकल र्याली लिएर वीरगञ्जको पावर हाउस चौकमा बिहान ११:३० बजे पुग्न र दिउँसो १२ बजेदेखि नगर परिक्रमा गरिने भएकोले अनिवार्य रूपमा बढी भन्दा बढी मोटरसाइकल लिएर आउन निर्देशन को साथ जानकारी गरिन्छ । मोटरसाइकलमा आ-आफ्नो जन सङ्गठनको झन्डा अनिवार्य लगाउन जानकारी गराउँछौँ,” गुप्ताले जारी गरेको पत्रमा लेखिएको छ ।
काठमाडौँमा शुक्रवार राजवादी समर्थक समूहहरूले मच्चाएको उत्पात पश्चात् प्रमुख राजनीतिक दलहरूले सक्रियता बढाएका छन् । शुक्रवार राजवादीहरूले काठमाडौँको बालकुमारीमा राष्ट्रिय स्वतन्त्र पार्टी (रास्वपा) का प्रमुख सचेतक सन्तोष परियार, जडीबुटी औषधी प्रशोधन केन्द्रका आठ वटा गाडीहरू जलाएका थिए भने तीनकुनेको एउटा घरमा समेत आगजनी गरेका थिए ।
आगजनीमा परेर एभिन्युज टेलिभिजनका पत्रकार सुरेश रजकको मृत्यु भएको थियो भने प्रदर्शन उग्र भएपछि नियन्त्रण गर्न प्रहरीले चलाएको गोली लागेर कृत्तिपुरका सविन महर्जनको पनि मृत्यु भएको प्रहरीले जनाएको छ ।
प्रहरीले अहिलेसम्म घटनामा संलग्न १०५ जना भन्दा बढीलाई पक्राउ गरिसकेको छ । उनीहरूमाथि के कस्तो मुद्दा चलाउने भन्नेबारे प्रहरीले छलफल गरिरहेको छ । प्रदर्शनका कमान्डर दुर्गा प्रसाईँ फरार छन् । राप्रपाका उपाध्यक्ष रवीन्द्र मिश्र, महामन्त्री धवल शमशेर राणा, स्वागत नेपाल लगायत पक्राउ परिसकेका छन् ।
त्यस्तै सरकारले पूर्व राजा ज्ञानेन्द्र शाहको राहदानी खारेज गर्नुका साथै उनको सेवा सुविधामाथि पनि रोक लगाउने तयारी गरेको छ ।
-1743606483.jpeg)
