विशाल यादव / पर्सा । विगतमा भएको विकास निर्माण कार्य , इन्धन खर्च , सवारी प्रयोग गर्ने कर्मचारीको नाम , सवारी मर्मत खर्चको हिसाबकिताब सार्वजनिक गर्नुपर्ने मागसहित सखुवा प्रसौनी गाउँपालिकाको एक टोलीले गाउँपालिकाका अधिकृतलाई ज्ञापनपत्र बुझाएका छन् ।
सखुवा प्रसौनी गाउँपालिकाका स्थानियहरुको टोलीले गाउँपालिका प्रमुख प्रशासकीय अधिकृत रामबाबु कुशवाहालाई ज्ञापनपत्र बुझाएका हुन् ।
विकास निर्माणको काम नगरेर आर्थिक हिनामिनातर्फ मात्र ध्यान दिदा गाउँबासी सेवा सुविधाबाट बन्चित हुनुपरेको स्थानियहरुले प्रतिक्रिया दिएका छन् । निर्वाचन सम्पन्न भएको ३ वर्ष भएपनि अहिलेसम्म जनताले स्थानीय सरकार रहेको अनुभूति गर्न सकेको छैन्, भने-जनतामा निराशा रहेको उहाँहरुको भनाई छ । गाउँपालिका भरिको सडक, नाला, खानेपानी, स्वास्थ्य र शिक्षाको अवस्था दिनानुदिन खराब हुँदै गएपनि अध्यक्षले चासो नलिएको स्थानियहरुले आरोप लगाए ।
जनता निरास भएर गाउँपालिका विरुद्ध आन्दोलन गर्ने सोच बनाइसकेको अवस्था छ। यो भन्दा खराब अवस्था के हुन्छ ? उहाँहरुको प्रश्न रहेको थियो।
गाउँवासी र युवाहरुको विशाल उपस्थितीमा प्रमुख प्रशासकीय अधिकृत कुशवाहालाई विभिन्न ३ बुँदे मागसहितको ज्ञापन पत्र बुझाएका हुन् । गाउँपालिकाले गर्दै आएको कामकाज प्रति गाउँवासीको असन्तुष्टि रहेको र आर्थिक हिनामिना गरेको भन्दै, स्पष्टिकरणसहित छिटै मांग पुरा गर्न चेतावनी समेत दिएको छ ।
गाउँपालिका भित्रका विद्यालयहरुलाई भौतिक सुविधा सम्पन्न बनाई गुणस्तरीय पठन पाठन गराउनुपर्ने, नगर भित्रका स्वास्थ्य चौकीहरुमा औषधि लगायतका स्वास्थ्य उपचार सेवाहरु उपलब्ध गराउनुपर्ने, गाउँपालिका भित्रका मूल तथा सहायक सडक, ढल, खानेपानीहरुको मापदण्ड तय गरी निर्माणलाई अगाडि बढाउनु पर्ने कुराको विषयमा उहाँहरूले ध्यानाकर्षण समेत गराएका छन् ।
आन्तरीक आय श्रोतलाई अभिलेखीकरण गरी व्यवस्थित तथा पारदर्शी बनाउनु पर्ने माँग समेत गरेको छ । त्यस्तै, कृषि सडक तथा विद्युतीकरण र सिचाई प्रणालीलाई प्राथमिकताका साथ अगाडी बढाउनु पर्ने मांग गरिएको छ।
ज्ञापन पत्रमा मिति २०८०/०४/०९ मा दर्ता गराइएको सूचना उपलब्ध नगराउनुको लिखित जवाफ उपलब्ध गराउन भनिएको छ । साथै पालिकाले आर्थिक वर्ष २०७९/८० , ०८०/०८१ र ०८१/०८२ को हालसम्म केकुन शीर्षकमा इन्धन खर्च गरेको विवरण उपलब्ध गराउन र पालिकामा कति वटा सवारीसाधन रहेको र केकुन् व्यक्ति , कर्मचारी र जनप्रतिन्धिले प्रयोग गरिरहेका छन् नाम सहित सवारी मर्मत खर्च उपलब्ध गराउन भनिएको छ ।
ज्ञापन पत्र बुझदै सखुवा प्रसौनी गाउँपालिकाका प्रमुख प्रशासकीय अधिकृत रामबाबु कुशवाहाले आफु छिटो भन्दा छिटो मागहरु पुरा गर्ने आश्वासन दिए ।
-1743606483.jpeg)
