महोत्तरीमा २३५ किलो गाँजा बरामद

समाचार

गृहपृष्ठ
समाचार
महोत्तरीमा २३५ किलो गाँजा बरामद

महोत्तरीमा २३५ किलो गाँजा बरामद

सोमबार, चैत १८, २०८१ ज्योति दैनिक

जनकपुरधाम । महोत्तरीको बर्दिबास नगरपालिका–३ बाट प्रहरीले २३५ किलो लागुऔषध गाँजा बरामद गरेको छ । गाँजा लोड गरेर राखिएको मिनी ट्रकसँगै प्रहरीले त्यसका चालकलाई नियन्त्रणमा लिएको छ ।
सोमबार साँझ पौने ७ बजे बीपी राजमार्गको सडक खण्डमा सिन्धुलीबाट बर्दिबासतर्फ आउँदै गरेको बागमती प्रदेश–०१–००६ ख ५३७१ नम्बरको निलो रंगको मिनीट्रकमा गाँजा फेला परेको हो ।

इलाका प्रहरी कार्यालय बर्दिबास र लागुऔषध नियन्त्रण ब्युरो शाखा कार्यालय बर्दिबास महोत्तरीबाट खटिएको संयुक्त प्रहरी टोलीले चेकजाँच गर्दा ट्रकको माथिल्लो भागमा फल्स बटम बनाई कालो त्रिपालले ढाकेर लुकाइएको अवस्थामा गाँजा पाइएको थियो ।

२३५ किलो गाँजा २० वटा पोकामा रहेको महोत्तरीका प्रहरी प्रवक्ता डीएसपी सन्तुलाल जयसवारले जानकारी दिए । मिनीट्रकका चालक मकवानपुरको थाहा नगरपालिका–७ डाँडाबासका २७ वर्षीय कविराज गोले छन् । उनलाई नियन्त्रणमा लिएर अनुसन्धान कार्य अघि बढाएको डीएसपी जयसवारले बताए ।

प्रकाशित मिति: सोमबार, चैत १७, २०८१ २१:२४