पर्सा । वीरगन्जस्थित बाल सुधारगृहमा आश्रित बाल कैदीबन्दीले मंगलबार नाराबाजीसँगै प्रदर्शन गरेपछि अवस्था तनावग्रस्त भयो । दिउँसो १२ बजेदेखि आधा घण्टा उनीहरुले गृहको पश्चिमतर्फको बार्दलीबाट नाराबाजीसहित प्रदर्शन गरेका थिए ।
सोमबार मधेश प्रदेश महान्यायाधिवक्ता कार्यालय तथा मंगलबार बिहान जिल्ला सरकारी वकिलको कार्यालयबाट अधिकारीहरु आएर सोधपुछ गरेर फर्किएपछि बाल कैदीबन्दी भड्किएका थिए । दिनहुँजसो कोही न कोही अधिकारी आएर आफूहरुको समस्या बुझेर जाने तर आधारभूत आवश्यकतासमेत पूरा नहुने गरेको उनीहरुको भनाइ छ ।
स्थिति तनावग्रस्त बन्ने देखिएपछि प्रमुख जिल्ला अधिकारी गणेश अर्याल, प्रहरी उपरीक्षक गौतम मिश्र, डीएसपी किशोर लम्साल, सशस्त्र प्रहरीका डीएसपी देवेन्द्रबहादुर सिंह लगायतका सुरक्षा अधिकारी दिउँसो करिब २ बजे सुधारगृह पुगेर बाल कैदीबन्दीको गुनासो आफैले सुनेका थिए ।
त्यस क्रममा बालकैदीबन्दीले आफूहरुलाई गृहमा कोचेर राखिएको गुनासो सुरक्षा अधिकारीसमक्ष गरेका थिए । यसका साथै गृहमा पढ्ने, संगीत तथा भाषागत तालिम लिनेजस्ता सुविधा नहुँदा समय कटाउन मुस्किल भएको उनीहरुले गुनासो गरेका थिए ।
बढेको गर्मीसँगै पंखा तथा खानेपानीको उचित व्यवस्थापन लगायत २२ सूत्रीय मागपत्र आफूहरुले गृहका प्रशासन प्रमुखलाई केही दिनअघि बुझाएकामा कुनै पनि सुनुवाइ नभएको बाल कैदीबन्दीको गुनासो रहेको छ । सोलार बत्ती, पंखा र ग्यास फ्यान, शौचालयमा ढोका, इमरजेन्सी लाइट, जाली ढोका, कपी, कलम, डस्टबिन, कुलर, बल्ब, धाराको टुटी, बालुवा प्रयोग हुने फिल्टर, कराइ आदि उपलब्ध गराउनुपर्ने उनीहरुको माग छ ।
प्रहरी उपरीक्षक मिश्रले बाल कैदीबन्दीको माग सामान्य रहेकाले ती पूरा गराउन सक्दो पहल गर्ने प्रतिबद्धता जनाएका थिए ।
प्रमुख जिल्ला अधिकारी गणेश अर्यालले गृहमा रहेका न्यूनतम मानवीय आवश्यकताका माग तत्कालै सम्बोधन हुने प्रतिबद्धता जनाए । आफूले एक साताभित्रै गृहको करिब सबै माग पूरा गराइसक्ने आश्वासन पनि दिए ।
गृह साँघुरो भएकाले वीरगन्जकै परवानीपुरमा रहेको ३ बिघा जग्गामा नयाँ बाल सुधारगृह भवन निर्माणका लागि पहल गरिरहेको पनि प्रजिअ अर्यालले बताए ।
गृहका निमित्त प्रमुख कृष्णप्रसाद साहले ५० जना क्षमता भएको गृहमा हाल १ सय २७ बाल कैदीबन्दी राख्नुपरेको बताए । गृहमा जम्मा ९ वटा कोठा रहेको छ । कोठाको आकार अनुसार ७/८ जना देखि २०/२५ जना सम्मलाई एउटै कोठामा राखिएको छ ।
गत वर्ष गृहमा २ पक्षबीच झडप हुँदा लामो समय तनावग्रस्त बनेको थियो । मधेश प्रदेशको एक मात्र बाल सुधारगृह भएकाले यहाँ बाल कैदीबन्दीको संख्या सधैं उच्च रहने गरेको छ ।
