पर्सा । चैती छठ पर्वको आज (शुक्रवार) बिहान व्रतालुहरुले उदाउँदो सूर्य र छठी मातालाइ अर्घ दिएसँगै यस वर्षको चैती छठ समापन भएको छ । व्रतालुहरुले यहाँको बागमती, बकैया, चाँदी नदी र पोखरी तथा जलासय पुगी उदाउँदो सूर्यलाई अर्घ दिएका हुन् ।
चैत शुक्लपक्षमा चार दिनसम्म मनाइने चैती छठ पर्वको अन्तिम दिन सप्तमी तिथि आज बिहान व्रतालुहरुले फेरि छठघाटमा पुगेर उदाउँदो सूर्य र छठीमातालाई अर्घ दिएपछि छठ पूजा विधिवत रुपमा समापन भएको हो । गत मंगलबारदेखि विधिवत रुपमा चैती छठ पर्व सुरु भएको थियो ।
छठ पर्वको प्रसाद छरछिमेक तथा आफन्तलाई दिने चलन छ । छठ प्रसादमा गहुँ वा चामलको पिठोबाट ठेकुवा, मुला, गाजर, बेसारको हरियो बेर्ना, ज्यामिर, नरिवल, सुन्तला, केरा, स्याउ, पानी सिंगडा, सुथनी, उखु लगायतका फलफूल हुन्छ ।
तराई मधेसवासीको महान् चाड छठ पर्व कात्तिक र चैतमा गरी वर्षमा दुई पटक मनाउने गरिन्छ ।
