जनकपुरधाम । मधेस प्रदेशसभामा देखिएको अवरोध हटाउन आज पुनः सर्वदलीय बैठक बसेको छ । प्रदेशसभा सचिवालयमा सभामुख रामचन्द्र मण्डलको उपस्थितिमा तेस्रो पटक सत्तापक्ष र विपक्षी दलका नेता एवं सांसदहरुको उपस्थितिमा बैठक चलिरहेको छ ।
यसअघि दुई दिन बोलाइएको सर्वदलीय बैठक विना कुनै निष्कर्ष सकेको थियो । आगामी मंगलबार प्रधानमन्त्री केपी शर्मा ओलीले प्रदेशसभामा सम्बोधन गर्ने कार्यक्रम रहेकाले त्यसअघि नै प्रदेशसभामा रहेको अवरोध हटाउन दलहरुबीच पटक पटक छलफल भइरहेको छ ।
यसअघि बुधबार बोलाइएको सर्वदलीय बैठकमा सत्तापक्ष र विपक्षी दल आफ्नो अडानमा कायम नै रहेपछि बिना निष्कर्ष बैठक सम्पन्न भएको थियो ।
विपक्षी दलहरूले विभिन्न विषयमा छानबिन समिति गठन गर्ने माग गर्दै बैठक अवरुद्ध गरेपछि अवरोध हटाउन चैत १२ गते बोलाइएको सर्वदलीय बैठक निष्कर्षविहीन भएपछि सदन नै अनिश्चितकालका लागि स्थगित भएको थियो।
सोही अवरोधलाई हटाएर पुनः प्रदेशसभा बैठक सुचारु गर्न सभामुख मण्डलले सबै दलहरुका सांसदहरुलाई बालाएर पटक पटक छलफल गरिरहेका छन् ।
विपक्षी दल जनता समाजवादी पार्टी र माओवादी केन्द्रले चैत १० गतेको बैठकमा योजना खरिद विक्री भइरहेको, मुख्यमन्त्री सतिशकुमार सिंहले कूटनीतिक मर्यादा विपरीत भारत भ्रमणमा गएको, सशर्त अनुदान लगायतको विषयमा छानबिन गर्न संसदीय छानबिन समिति गठन गर्नुपर्ने भन्दै बैठक अवरुद्ध गरेपछि त्यसयता बैठक बस्न सकेको छैन्।
सत्तापक्षले आरोप लागेका मन्त्रीहरूले सदनमा त्यस सम्बन्धमा जवाफ दिने र जवाफबाट सन्तुष्ट नभएपछि मात्र छानबिन समिति गठन गर्ने पक्षमा रहेको छ भने विपक्षी दलले मन्त्रीहरुले पटक पटक बोल्दै आएकाले अब यस सम्बन्धमा बोल्न नदिइ छानबिन समिति गठन हुनुपर्ने पक्षमा रहेको छ ।
