धनुषाको उत्तरी क्षेत्रमा आँखा पोल्ने समस्या

समाचार

गृहपृष्ठ
समाचार
धनुषाको उत्तरी क्षेत्रमा आँखा पोल्ने समस्या

धनुषाको उत्तरी क्षेत्रमा आँखा पोल्ने समस्या

शनिबार, चैत २३, २०८१ ज्योति दैनिक

ढल्केबर । धनुषाको उत्तरी क्षेत्रका स्थानीय आँखा पोल्ने समस्याले प्रभावित भएका छन् । वायु प्रदूषणका कारण ढल्केबर, धारापानी, गोदारलगायतका स्थानमा यस्तो समस्या देखिएको हो ।

ढल्केबरका रामकुमार महतोले वन क्षेत्रमा भइरहेको डढेलोको धुँवा फैलिएर आँखा पोल्ने समस्या देखिएको बताउनुभयो । उहाँ विगत तीन दिनदेखि यस्तो समस्या रहेको जानकारी दिनुभयो ।

यता डिभिजन वन कार्यालय धनुषाका प्रमुख विनोद सिंहका अनुसार धनुषाको वन क्षेत्रमा डढेलो नलागेको बताउनुभयो । उहाँले केही दिनअघि छिमेकी जिल्ला महोत्तरी र सर्लाहीका वन क्षेत्रमा लागेको डढेलोको असर यता देखिएको हुनसक्ने जानकारी दिनुभयो ।

चिकित्सक सञ्जय यादवले वायु प्रदूषणका कारण आँखा पोल्ने तथा श्वासप्रश्वासका बिरामी बढेको बताउनुभयो । उहाँले बालबालिका र वृद्धवृद्धा यो समस्याबाट बढी ग्रसित देखिएको बताउनुहुँदै सर्वसाधारणलाई सतर्कता अपनाउन सुझाव दिनुभयो ।

उहाँका अनुसार आँखा पिरो हुने, पोल्ने समस्या कम गर्न पानीले नियमित आँखा सफा गर्नुपर्छ । डढेलोका कारण सूक्ष्मकण र विषालु ग्यास उत्सर्जन हुने भएकाले यसबाट बच्न अत्यावश्यक कामबाहेक बाहिर ननिस्कन र अनिवार्य मास्क र चस्माको प्रयोग गर्न चिकित्सक यादवले सुझाव दिनुभयो ।

प्रकाशित मिति: शनिबार, चैत २२, २०८१ १५:४४