वीरगञ्ज । वीरगञ्जको प्रसिद्ध शक्तिपीठ गहवामाई मन्दिरबाट आज (शनिवार) चैते दसैँको पावन अष्टमीको अवसरमा गहवामाई माताको दोस्रो डोली यात्रा भव्य र उल्लासमय वातावरणमा सम्पन्न भएको छ ।
गहवामाई मन्दिर व्यवस्थापन समितिको संयोजन र सक्रियतामा आयोजित धार्मिक यात्रामा स्थानीय तथा बाहिरी क्षेत्रबाट आएका हजारौँ श्रद्धालु भक्तजनको उत्साहपूर्ण सहभागिता रहेको थियो ।
समितिका अध्यक्ष नरेन्द्र साहले बताएअनुसार डोली यात्राको सम्पूर्ण तयारी लामो समयदेखि भइरहेको थियो र आजको दिनलाई विशेष बनाउन कुनै कसर बाँकी राखिएको थिएन ।
आज दिउँसो २ बजे गहवामाई माताको डोली र निशानको विधिवत् रूपमा विशेष पूजा–आजा सम्पन्न गरिएको थियो । पूजापछि अपराह्न ४ बजे मन्दिर प्राङ्गणबाट डोली यात्रा औपचारिक रूपमा सुरु भएको हो । यात्राले वीरगञ्जको २ नम्बर रोड, बिर्ता मन्दिर, अलखीयामठ, महावीरस्थान हुँदै माईस्थानको चोकको परिक्रमा गरेको थियो। परिक्रमा पश्चात् डोली पुनः गहवामाई मन्दिरमा फर्केर भव्य समापन गरिएको छ ।
डोली यात्राको विशेष आकर्षणको रूपमा सहभागी भक्तजनलाई गहवामाई माताको तस्बिर अङ्कित निशान वितरण गरिएको थियो ।
समितिले प्रति निशान ३५० रुपैयाँ शुल्क निर्धारण गरेको थियो । गत वर्ष पहिलो डोली यात्रामा ६५० वटा निशान वितरण भएको स्मरण गर्दै अध्यक्ष साहले यस वर्ष सहभागिता र उत्साह अझ बढेको बताए । निशान प्राप्त गर्न भक्तजनमा ठूलो उत्साह देखिएको र यात्रालाई माताको आशीर्वादको प्रतीकका रूपमा लिइएको स्थानीय श्रद्धालुले बताएका छन् ।
डोली यात्राको क्रममा मन्दिर वरपरको क्षेत्र भक्तजनको भीडले भरिएको थियो भने बाटोमा भजन–कीर्तन र माताको जयजयकारको गुञ्जनले वातावरणलाई थप भक्तिमय बनाएको थियो ।
डोली यात्राको भव्य सफलतापछि आयोजकले साँझ मन्दिर प्राङ्गणमा महाआरतीको विशेष कार्यक्रम आयोजना गर्ने तयारी गरेको छ । महाआरतीले दिनभरको धार्मिक उत्सवलाई अझै उचाइमा पुर्याउने अपेक्षा गरिएको छ ।
अध्यक्ष नरेन्द्र साहले सम्पूर्ण भक्तजन, सहयोगी र आयोजक टिमप्रति कृतज्ञता व्यक्त गर्दै आगामी वर्षहरूमा पनि यस्ता धार्मिक कार्यक्रमलाई निरन्तरता दिइने प्रतिबद्धता जनाएका छन् । उनले सबैलाई आस्था, श्रद्धा र एकताका साथ सहभागी भई गहवामाई माताको कृपाको अनुभव गर्न आह्वान गरेका छन् ।
-1743920818.jpg)
-1743920424.jpg)
-1743871272.jpeg)
-1743920818.jpg)
