रौतहट । १४ वर्षीय बालकको हत्या गर्ने ४ अभियुक्तलाई रौतहट प्रहरीले सार्वजनिक गरेको छ। पक्राउ पर्नेमा वृन्दावन नगरपालिका-७ का २५ वर्षीय नागेन्द्र सहनी, साधु भन्ने २२ वर्षीय नागेन्द्र सहनी, गौर नगरपालिका-४ का विकास पटेल, गौरकै वडा नम्बर ८ का अनिल साहलाई पक्राउ गरेर रौतहट प्रहरीले सार्वजनिक गरेको हो।
हत्या भएका नाबालक वृन्दावन नगरपालिका-७ बस्ने सुरुज राय यादवको छोरा १४ वर्षीय कृष्ण प्रसाद यादवको शव गरुडा नगरपालिका-८ स्थित चाँदी खोलामा फेला परेको थियो। गत वैशाख ६ गते टिकटक बनाउने भन्दै मृतक कृष्ण प्रसाद यादवलाई फोन गरी गरुडानगरपालिका-८ स्थित चाँदी खोलामा बोलाएका थिए।
मृतक कृष्ण प्रसाद यादव सो स्थानमा पुगेपछि अभियुक्तहरूले उनलाई नियन्त्रणमा लिई मोबाइल खोसी सोही मोटरसाइकलमा तीनै जना चाँदी खोला गएको अनुसन्धानमा खुलेको जिल्ला प्रहरी प्रमुख, प्रहरी उपरीक्षक दिलीप घिमिरेले बताए।
वैशाख ११ गते छातीमा र पेटमा गोली लागेको, घाँटी छिनिन लागेको, पेटबाट भित्री अङ्गहरु बाहिर निस्केको, टाउकोको भाग सडिगलेको अवस्थामा यादवको शव चाँदी खोलामा फेला परेको थियो। प्रहरीको अनुसन्धानमा दुवै परिवार बीच पुरानो रिसिबी रहेको खुलेको छ।
नागेन्द्र सहनीको भतिजी मृतकको बुबाको इँटा भट्टामा डुबी मरेको विषयमा मारेको भनि मृतक परिवारले आरोप लगाउँदै आएकाले पारिवारिक रिसिबी रहेको खुल्न आएको उपरीक्षक घिमिरेले बताए।
घटनास्थल पुगेर प्रहरीले अनुसन्धान गर्दा साधु भन्ने नागेन्द्रले कृष्णलाई धकेली लडाएर छातीमा २ राउण्ड गोली हानेको खुलेको छ।
घटनापश्चात दुवै जना मृतककै मोटरसाइकलमा साधु भन्ने नागेन्द्र सहनीको दुर्गाभगवती गाउँपालिका-५ स्थित बहिनी ज्वाइँको घरमा उक्त पेस्तोल लुकाएको, मोटरसाइकलको नम्बर प्लेट भाँची माटो भित्र गाडेको र मोटरसाइकल सोही घरमा छाडी गएको प्रहरीको अनुसन्धानले देखाएको छ।
वैशाख ७ गते मृतकको बिआर ०५ डब्लु ०१३७ नम्बरको मोटरसाइकल विकास पटेललाई ५ हजार रुपैयाँमा बेचेको र गौरको मोटरसाइकल ग्यारेजबाट काटिएको अवस्थामा फेला परेको प्रहरीको अनुसन्धानबाट खुलेको छ।
त्यस्तै दुर्गा भगवती गाउँपालिका-५ का नागेन्द्र सहनीको बहिनिको घरबाट लुकाई राखेको अवस्थामा घटनामा प्रयोग गरिएको कटुवा पेस्तोल बरामद गरेर पक्राउ परेका ४ जनलाई ७ दिन म्याद थप गरेर थप अनुसन्धान भइरहेको उपरीक्षक घिमिरेले बताए।
-1745834753.jpg)
