वीरगंज । मुस्लिम समुदायको आयोजनामा वीरगंजमा शनिवार इद मिलन समारोह सम्पन्न भएको छ । समारोहलाई नेकपा एमालेका बरिष्ठ उपाध्यक्ष ईश्वर पोखरेलले सम्बोधन गर्दै एकिकृत नेपाल निर्माणमा मुस्लिम समुदायको भुमिकाबारे चर्चा गरेका थिए ।
उनले सवै धर्मका मानिस मिलेर नेपालको बिकाश गर्नुपर्ने समय आएको बताएका थिए । नेपालमा १० धर्मका ब्यक्तिको बसोवास रहेको चर्चा गर्दै उनले धार्मिक विधिताका वीचमा एकता नेपाली समाजको सौन्दर्य भएको बताए । उनले रष्ट्रिय हित र एकताको निम्ति मुलुकमा सदभाव र एकताको खाँचो रहेको बताए ।
कार्यक्रमलाई सम्बोधन गर्दै पर्साको क्षेत्र नं १ का प्रतिनिधि सभाका सदस्य पदीप यादवले धार्मिक कुरा भावना संग जोडिने भएकोले सम्बेदनशील हुन आवश्यक रहेको बताए ।
केही दिन देखी समाजमा धार्मिक सदभावलाई बिथोल्ने प्रयास भइरहको आफनो अनुभव रहेको बताउदै पूर्वमंत्री समेत रहेका यादवले यस बारेमा आफूले मुलुकका प्रधानमंत्री प्रहरी प्रमुख स्थानीय प्रशासनलाई अवगत गराएको बताए ।
केही तत्व सदभाव बिगार्न योजनावद्ध रुपमा लागेको छ यो बिषयमा हामी जानकार छैनौ भन्ने छैन उनले भने “सामाजिक सदभाव बिगारेर समाजको शान्ति भंग गर्न खोज्ने जोसुकैलाई प्रशासनले कानून अनुसार कारवाही गर्नु पर्छ ” ।
सासद यादवले समाजको इतिहासको चर्चा गर्दै भने “हामी सबै दाजुभाई हौं यो सम्बन्ध त परम्परादेखीको हो यसलाई तोड्न हुदैन र कसैले तोडने सपना पनि देख्नु हुदैन ।
कार्यक्रममा प्रदेश सरकारका उधोग तथा पर्यटन राज्यमंत्री रहवर अन्सरीले चाडपर्वहरु प्रहरीको सुरक्षाघेरा भित्र मनाउनु पर्ने अवस्था आयो भने त्यहा केही समस्या छ भन्ने बुझनु पर्ने बताए । उनले धार्मिक बिचारमा बिविधता त छ तर त्यहा सहिष्णुता पनि हुनु पर्ने बताए । धार्मिक तथा सामुदायिक सहिष्णुताले मात्र समाजको सुरक्षा र बिकासको प्रत्याभूती गर्ने मंत्री अन्सारीले बताए ।
वीरगंज महानगरपालिकाका प्रमुख राजेशमान सिंहले सामाजिक सदभाव बिथोल्ने प्रयास भइरहेको प्रति समाजका सबै तप्का सम्बेदनशील हुनु पर्ने बताए । उनले कुनै पनि समुदायमा सदभाव बिगार्नेहरुको कदमलाई नियन्त्रण गर्ने अग्रसरता हुनु आवश्यक रहेको बताए ।
उनले कागले कान लग्यो भन्दैमा कागको पछाडि कुदन नहुने बरु कान छाम्नु पर्ने सुझाव दिदै बदमाशी गर्ने जो कोहीलाई कानूनी दायरामा ल्याएर दण्डीत गर्नु पर्ने बिचार ब्यक्त गरे ।
उनले सोसल मिडियामा गैर जिम्मेवारीपूर्वक जे मन लाग्यो त्यही लेख्ने प्रवृति बढेको प्रति चिन्ता समेत ब्यक्त गरे ।
कार्यक्रममा पर्सा क्षेत्र २ का सासद अजय चौरसिया, प्रदेश सभा सदस्य श्याम पटेल, उपमेयर ईम्तियाज आलम , नेशनल मेडिकल कलेजका अध्यक्ष डा. जैनुदिन अंसारी, नेपाल पत्रकार महासंघ मधेश प्रदेशका महासचिव श्याम बन्जारा,वीरगंज उद्योग वाणिज्य संघका अनिल अग्रवाल, महम्मद शाहबुदिन ,औषधि व्यवसायि संघका अध्यक्ष ताजुदिन अंसारी लगायतकाले शुभकामना मन्तव्य व्यक्त गरेका थिए ।
मेडिकल कलेजका प्रबन्ध निर्देशक बसरुदिन अंसारीको अध्यक्षतामा सम्पन्न कार्यक्रमको सहजीकरण शशिकपुर मियाँले गरेका थिए । कार्यक्रम टाउन हलमा सम्पन्न भएको थियो ।
