विद्यालयभित्र राजनीतिक गतिविधि सञ्चालन गर्नेलाई कडा कारबाही गर्ने चेतावनी

समाचार

गृहपृष्ठ
समाचार
विद्यालयभित्र राजनीतिक गतिविधि सञ्चालन गर्नेलाई कडा कारबाही गर्ने चेतावनी

विद्यालयभित्र राजनीतिक गतिविधि सञ्चालन गर्नेलाई कडा कारबाही गर्ने चेतावनी

सोमबार, भदौ ३१, २०८१ ज्योति दैनिक

वीरगञ्ज । बाराको शिक्षा विकास तथा समन्वय इकाईले विद्यालयभित्र राजनीतिक गतिविधि सञ्चालन गर्नेलाई कडा कारबाहीको चेतावनी दिएको छ ।

इकाई प्रमुख हेमराज खतिवडाले आइतबार एक सार्वजनिक सूचना जारी गर्दै विद्यालयहरूमा राजनीति प्रवेश गराउने शिक्षक वा प्रधानाध्यापकविरुद्ध कारबाही हुने स्पष्ट पारेका छन् ।

यस चेतावनीको कारण हालैको घटनासँग जोडिएको छ, जहाँ प्रभु साहको नेतृत्वमा रहेको आम जनता पार्टीका नेताहरूले कलैया उपमहानगरपालिकाका विभिन्न विद्यालयहरूमा विद्यार्थीहरूलाई कक्षाकोठामै राजनीतिक नाराबाजी गर्न प्रोत्साहित गरेका थिए । ‘नो टिचर, नो टिचिङ’ भनिएको नारा सहितको भिडियो सामाजिक सञ्जालमा भाइरल भएपछि इकाईले कारबाहीको सङ्केत गरेको हो ।

हाल इकाईले दोषी शिक्षक वा दलहरूको नाम सार्वजनिक नगरे पनि कानुनी कारबाहीको प्रक्रिया अघि बढाउने सङ्केत गरेको छ । सूचना जिल्ला प्रशासन कार्यालय बारालाई जानकारीको लागि पठाइएको छ ।

“विद्यालय शान्ति क्षेत्र कायम राख्न निर्देशिका २०६८ अनुसार विद्यालयहरूमा कुनै पनि राजनीतिक गतिविधि गर्न/गराउन निषेध गरिएको छ। बालबालिकाको शैक्षिक गतिविधिमा असर पर्ने हरेक प्रयासलाई रोक्न हामी प्रतिबद्ध छौँ,” इकाई प्रमुख खतिवडाले भने ।

विद्यालयहरूमा शिक्षण वातावरण सुरक्षित राख्न तथा राजनीतिक हस्तक्षेपको अन्त्य गर्न यो कदम महत्त्वपूर्ण मानिएको छ ।

प्रकाशित मिति: सोमबार, भदौ ३१, २०८१ १४:४२