वीरगञ्ज । पर्सा जिल्लामा प्रहरीले अवैध गाँजा खेतीविरुद्ध निरन्तर अभियान चलाउँदै सखुवा प्रसौनी गाउँपालिका–१ सिद्धपुरस्थित कोईलाभार साझेदारी वनमा बुधवार फडानी अभियान सञ्चालन गरेको छ ।
जिल्ला प्रहरी कार्यालय पर्साका प्रवक्ता, प्रहरी नायब उपरीक्षक (डिएसपी) दीपक भारतीका अनुसार, इलाका प्रहरी कार्यालय पटेर्वासुगौली र मातहतका प्रहरी टोलीले करिब १० कट्ठामा रोपिएका ३,५०० भन्दा बढी गाँजाका बोटहरू फडानी गरेर नष्ट गरेको हो ।
प्रहरीले यसअघि पनि गाँजा खेतीविरुद्ध कडा कदम उठाउँदै, गत सोमबार सखुवा प्रसौनी गाउँपालिकाको वडा नम्बर १ स्थित विन्दवासिनी कोईलाभार साझेदारी वन र राष्ट्रिय वन क्षेत्रमा फैलिएको ५ बिघा गाँजा खेती नष्ट गरेको थियो । गत शनिवार पर्सागढी नगरपालिका–१ र ३ मा गरी दुई बिघामा फैलिएको करिब १५,००० गाँजाका बोटहरू नष्ट गरिएको थियो, जबकि यस अभियानको आरम्भ गत बुधवार पटेर्वा सुगौली गाउँपालिका–२, थरघाटी टोलमा ८,००० गाँजाका बोट नष्ट गर्ने कार्यबाट भएको थियो ।
यद्यपि गाँजा खेतीको स्थानहरूको पहिचान र नष्ट गर्ने अभियान जारी रहे पनि खेती गर्नेहरूको पहिचानमा चुनौती कायम रहेको छ । डिएसपी भारतीले बताए अनुसार, अधिकांश गाँजा खेती वन क्षेत्र वा सार्वजनिक जग्गामा लगाइने भएकाले सम्बन्धित व्यक्तिहरूको पहिचानमा कठिनाइ हुने गरेको छ । स्थानीयहरूले पनि सुरक्षा निकायको मिलेमतोमा गाँजा खेती हुने आरोप लगाउने गरेका छन्, तर प्रहरीले भने आफ्नो अभियानलाई प्रभावकारी बनाउन निरन्तरता दिएको बताएको छ ।
डिएसपी भारतीका अनुसार, गाउँका बासिन्दाहरूले गाँजा खेती गर्ने व्यक्तिहरूबारे जानकारी दिन नचाहने प्रवृत्तिका कारण खेती गर्नेहरूको पहिचान र कानुनी कारबाही चुनौतीपूर्ण बन्दै गएको छ । यद्यपि, पर्सा प्रहरीले यसलाई नियन्त्रण गर्ने प्रयास जारी राखेको जनाएको छ ।
-1730300782.jpeg)
-1730300782.jpeg)
